قصة منصور

ترين ترين ترين
عيل في سن ال15 ملابسه تدل على حالته المعيشيه وصوت هزيل مثل جسده المحتاج لكل أنواع الفيتامينات والاغذيه
بليله و فول عجميه يافول ترين ترين ترين جرس حديد في أيديه .
كل يوم أنادي عليه ليس عشقا لما يبيعه ولكن مساعده مقنعه لانه يأبى أن يعطف عليه أحد.
يا دُقدُق
نعم يا باشا مساءك عجميه بس وَلا معاه بليله.
لا يا لمض ومعاه بليله زي كل يوم
ربنا مايقطعلك عاده يا زوق.
انزله ال 5 جنيه في سلة البالكونه ب 2ج  فول و ب2ج بليله
والباقي ياباشا
هايقع من السله خليه لحجارة الجرس
يضحك دُقدُق متشكر لذوق حضرتك ربنا يبارك في ولادك.
كان ميعاده تقريبا مابين صلاة المغرب والعشاء. إنتظرته النهارده يعدي ولا أسمع صوت الجرس أبدا نزلت أصلي العشاء و أنا راجع سالت حسين البواب الواد دُقدُق ماعداش النهارده.
رد حسين لا ياباشا تحب أجبلك من أول الشارع في مطعم كويس.
لا لا متشكر جدا.
مر يوم و أتنين على كده و دُقدُق مظهرش. أسأل مين عنه ومين يجاوبني حيره والله ولد غلبان إتعودت على حواري البسيط الجميل معاه كلمات معتاده لكن لها مفعول السحر في نفسي
تتبعت خط سيره في حضوره أمام العماره رجعته بالعكس دخلت الشارع اللي بشوفه جاي علينا منه ومنه للي بيجي منه للي بيجي منه حتى وصلت منطقه شعبيه جدا جدا.
سالت أطفال من سِنه عن دُقدُق بتاع الفول والبليله.
جاني منهم رد مزعج
في المستشفى متعور من كام يوم .
إيه إللي حصل أتعور إزاي
أسأل أمه هناك بتبيع فول نابت هناك أهيه.
السلام عليكم أزيك يا حاجه
عليكم السلام ياباشا معلش آخر مره مش هافرش هنا تاني ولا هاتشوفني هنا أنا مروحه بس سيب التِشت بتاع الفول أبوس إيدك ماليش رزق غيره.
إنتي بتكلمي مين يا حاجه .. انا بسأل عن أبنك دُقدُق .
عمل أيه تاني معلش يابيه لو غلط سامحه ده غلبان يتيم الأب والأم وفي المستشفى دلوقتي سرق منك حاجه.
يا ستي أبدا والله أنا وحشني الفول بتاعه كل يوم بشتري منه فول و بليله.
أنت ساكن فين ياباشا في حي المستشارين
أيوه حضرتك بتاخد كل يوم  ب 2ج فول و زيهم بليله وتسيب الباقي للحجاره صح.
ضحكت من قلبي جدا
كل يوم يجي ويحكيلي ونضحك زي كل يوم كأنها أول مره ربنا يحفظك ويفرحك بولادك يارب.
المهم قوليلي هو ماله وإيه حكاية يتيم الاب والأم دي هو مش أبنك.
أولا لا مش أبني منصور يبقئ أبن بنتي ماتت وهيا بتولده وأبوه من ضيق الحال رماهولي و دخل السجن تأبيده .
من وهو عنده سَنه.
أما إتعور إزاي كان راجع من السرحه بتاعة كل يوم وطلع عليه عيل مبرشم مرشد للحكومه كان بيضربه والمخبر معدي معبرهوش الواد كان مثبته بموس عايز ياخد الفلوس إللي معاه منصور خبطه بالجرس التاني طلع الموس وعوره في وشه واخد 30غرزه داخلي وخارجي ولُكميات في وشه وزحفه على الأرض والمخبر على القهوة ماتحركش عشان ده المرشد بتاعهم على الناس اللي بتسهر في المسجد أو بتصلي الفجر وتقعد تسمع درس الفجر أو بين المغرب والعشا.
ولا حول ولا قوة إلا بالله
كنت مرعوبه منك ياباشا
مني أنا ليه بس كنت بحسبك أمين شرطه
ولا من بتوع البلديه وهاتقلب الفول او تاخد التشت لكن ربنا ستر.
عايز أروح أطمن على منصور (دُقدُق) تيجي معايا ولا توصفيلي
تعالى ورايا من غير ماحد ياخد باله .
خير يا حاجه
منصور عندي في الشقه مخبياه مش بيطلع منها الناس عارفه انه لسه في المستشفى عشان الواد المنيل عايز يعوره تاني وأنا خايفه عليه.
روحت وراها الشقه عباره عن غرفه وصاله صغيره في حجم نفس الغرفه وحمام من داخل المطبخ بالكاد يكون مطبخ هو بوتاجاز ورخامه على اليمين واللي واقف يعمل الأكل واقف في سكة الحمام.
والفرش في الارض يدوبك حاجه ساتره البلاط المشبع رطوبه والحوائط كلها ملح تشققات و رشح مياه من آثار الصرف الصحي حولهم دخلت على منصور الأوده وجدته على كنبه بلدي عليها كليم ومسند نايم عليها ومتغطي ببطنيه سوداء ميري فكرتني بالعسكريه أول لما شافني أعتدل.
باشا باشا معقوله إزي حضرتك وصلت هنا إزاي عرفت البيت من مين
أنت غالي عليا أوي انا فرحان اني شوفتك بجد.
كل ده وأنا مبتسم في وجهه تركته يتكلم على سجيته.
تفضل ياباشا
كانت الحاجه عملت كوب شاي و أحضرته .
منصور قوم أنا عايزك وعايز أكلم الحاجه كمان محتاج أتكلم معاكم ممكن تسمعوني

هاقولكم على طلب ورجاء مني ممكن
انا ولادي مسافرين خارج مصر عايشين بره في أوربا وانا وحداني عايز حد يعمل صوت ودوشه و ونس في البيت انتم تتفضلوا تعيشوا معايا في الفيلا انا شقتي دورين فيلا داخل العماره وحاسس بغربه فيها .
هاسيبلكم الدور السُفلي نعيش فيه كلنا طول النهار و وقت النوم هانام فوق وانتم ليكم تحت غرفه كبيره بالحمام الخاص بيها دي مخصصه لضيوف والمطبخ جنبها .
نفطر ونتغدا ونتعشا كمان سوا .
مش عايز رد دلوقتي فكروا براحتكم وأتمنى الاقيكم جايين مع بعض تخبطوا على الباب السلام عليكم.