دموع الضحكه
بالله عليك قولي
ليه نرسم الضحكه
على الوشوش زور
فيها أيه يعني
لو مره يحسوا
مره بس بينا
إحنا مربوطين ليهم
متكتفين كما الثور
في سواقيهم يدور
ضحكتي ومرسومه ليهم
و دمعتي مين يترحم عليها
لو سبت نفسي أبكي بحور
لمستك دي شايفنها تمثيل
والحمل لك معايا جبل بيميل
ونظرتهم لينا تكبر و غرور
لو يوم ليهم ما ضحكناش
ولا على وشوشنا مارسمناش
نفوسهم الغبيه علينا تثور
أنا خلاص راح امسح ضحكي
ولا هاخبي الهم ولا أبكي
واللي مش عاجبه يرحل يغور
في فتارين إحنا واقفين
لا كلمه حلوه منهم ولا راحمين
أنا كرهت نظرة الجمهور
تعبنا خلاص وقوف في مسارحكم
مالنش غير الهم بين افراحكم
اكتبونا غياب وانتم حضور
حسن سعيد ابراهيم
تعليقات
إرسال تعليق