مواطن

هيا ليه الناس كده
ماشيه حزينه متنكده
شايله هم بكره

ماهي الدنيا على ده وِ ده
مظلومين و ظَلمه قلوبهم مستأسده
والغلابه خايفه تحلم بمسره

لملمت خيوط الوجع أغزل توب
يا خساره حتى توب الهم ما ستر
طلع مرقع كاشف عيوب

والعرق نازل يجري من الكد والشقى
روحت لعيالي بعشاهم
بايت جنبهم حزين خالي الجيوب

مهدود البدن والفكر واعي
والميزان بالحَسابه منصوب
عليك كام للدوا وإيه للبقال مطلوب

الدمع على خدك جاري .. صاحِبته
كملت عشاك هم و صاحبك
كان سكر خفيف مشروب

يارب...يارب بدل الحال برضاك
وأجعل زمان ولادي خير
يعيش غالب يرحم المغلوب
ولا ينسى أصل أبوه
ياما كان على رزقه مكفي ومصلوب

يابني خليك رحيم بناسك
و إوعاك يوم حد يرفع أيديه
يناجي فيك رب القلوب
ولا حد يقول عليك تربية راجل معيوب

الأصيل يابني ما بتبنيه معدتة
لو تجوع روحه قلبه وعقله شبعانين
خليك رايه لبلدك بين الشعوب

مهد الرجوله هنا أتسست
وجدرها في طينها مزروع
لكن هانقول أيه أحوال بالشقلوب

يتحكم فيك عويل طبال
يتحنجل يقول مواويل
في عديم الكرامه واللي منها مسلوب

خليك أنت أصيل زي طينها
مهما إسودت قلوب الناس
والشر عِشقهم وليهم محبوب

خليك طَيب و طيُب

حسن سعيد ابراهيم
#مواطن