اهل النوبه
مِن قبل الوعد و قبل السد
كُنا هناك ساكنين
الكف متحني طيبه والبيوت من طين
الأبيض من قِلوبنا طارح ضي ع القفاتين
تعبنا شقينا لَجل الوِلاد ما يتعلموا يكونوا فاهمين
إن القضيه مش ورث و لا نِزاع على حدود مين
داحنا أهل وعشره وعلى بعض لحم ودم متحرمين
أخدوا وِلادنا سُخره يساعدوهم راح علي وأخوه حسانين
وولاد البيه هناك يتفرجوا على سمار متغمس عجين
البيه وولاده يتحكموا يتكلموا يخططوا واحنا مطحونين
خِلص السد واتمنع عنا الطمي تقول روحنا راحت وياه
والبيت والغيط حتى الحماره والحمار والكلب مِعاه
والقفاتين إتبللت بالدمع الحزين ع الخد يا ولداه
كتير بَكينا و شكينا لمسؤل بالوعود والأحلام صدقناه
نكتب ورق نجمع بصمة
كف و كفوف غابة الحنه مش باقي عليه غير شقاه
(يقولوا أمن قومي ...وانا يا ناسي يا قومي ...مش من أهل قومي ...طيب ليه ماكنش قومي..... لما كانت حروفنا شفرتنا في فرحتنا بانتصار قومي)
سال الدمع و اتفرقوا العيال
كتب وبكى بين حروفه الخال
وغنى و دندن عن حالنا ألف موال
لكن نقول أيه وإيه بعدكلامه ينقال
نِعد الأيام والشهور دي بقت سنين والهم مازال
و أخرتها أيوه و أخرتها كان هنا شعب جذره في الأرض عُضال
فاكرين وارثين قضيتنا مهما الظلم طال
ولسه الحلم فينا ساكن و موجود
نلعب ونجري لما يوم اكيد هانعود
وولادنا تغني وترقص مع مسك و عود
نهادي الكل ريحان أخضر مع ورود
والوطن يعلى نعيش سعيد جنب مسعود
تتواصل الأجيال مافي لعادات حدود
أبيض أسود المهم عاشق قلبك ودود
حسن سعيد ابراهيم
#ايكادولي
تعليقات
إرسال تعليق