الغربة

#الغربه

جوا الجسد روح متغربه عن الذات عايش

بين الناس  لكني غريب جوايا حاسس إني مابعرفنيش .

بخبي عنهم أحزاني و أخبي كمان أفراحي يمكن عشان حق فيها ماليش.

دموع على الخد و ابتسامه معاها مرسومه بحرفه عنها ما تسألنيش.

بعيش اليوم بيومه بحزنه و همومه والفرحه أمل ما بيجيش.

حتى لو جاتني الفرحه دقايق بعيشها يجي الهم في لحظه ما بيخليش.

حتى البسمه المرسومه تمثيل على وشي الغاضب للروح ما تدواي ولا تشفيش.

نظرات الناس بالحقد و الحسد على فرحه سترا الهموم بطبعهم ما بترحمنيش.

بتعدي الأيام بتجري كله من عمري و اللحظه إللي تروح يا خساره ما بتجيش.

حتى طبطبة الغريب لو شفقه و رحمه عن حنان إللي منك أبدا ما بتغنيش.

عاتبت الفرح ليه عني بعيد والهم ساكني يقول بيعدي من هنا ولا يشوفنيش.

قلتله طول حياتي على طريق الأمل بستناك وأنت بتعاند وهنا ما بتجيش.

نفسي تسكن حياتي و لما تغيب غيب لكن أرجع بسرعه حاول ماتوحشنيش.

أصل خلاص ماعدش في العمر عمر إللي راح راح و اليوم إللي يعدي ما بيرجعليش.

نفسي عن الهموم أرحل و بعيد عنها أعيش تنساني و عليا ما تناديش.

فاتح لدنيا أحضاني راوي الكل بحناني وانتي ليه جناين فرحي ما بترويش.

الغصن أتحنى من الأحزان لكن عطر الورد هديتي لكل الناس حتى إللي مرحمنيش.

ببكي على أزهاري إللي دبلت من ظلمهم و أتعجب من حالهم إللي على حالهم ما بيبكيش.

عنكم راحل لغربتي أرحم من قلوبكم إللي على الأصيل لا بتحافظ و لا تبقيش.

و أن يوم حن الشوق ليكم سيبوني عليكم أنادي أرجوكم ما تسمعونيش.

حسن سعيد ابراهيم
#سونتي