تشرب شاي
#تشرب_شاي
راح أقوم أعمل شاي
تشرب يا واد عمي معاي
تعالى نقعد في الضلايه و أحكيلك
العيال همهم زاد و الحمل تقيل
زي مرار الصبر و ام العيال معاي
صبره هيا كمان حالفه ما تميل
لما أعاود الدار تحقني معفر
تهديني بضحكه تخفي همومها
وتقول هليت يا دوا العليل
أسكت ماقدر أحكيلها حالي و همي
تقولي كنت في زياره و داعتلك أمي
يديلك ربنا الرزق و السعاده وصبر جميل
أقولها إعملي شاي سكر زياده تقيل
تمرر كوبيتها هيا و ليا تحليها
تضحك في عيني و نبضها عويل
الحال يا واد عمي صعيب ع الكل
لكن الرزق من ربك ست تشيلك
وقت العسر تهون عليك ظلام الليل
تتبسم وتغنيلك تعشش عليك
تمسح تعب يومك ملكه في بيتها
صالبه طولها تتحمل كيف النخيل
عايز سكر يا واد عمي ولا مالك كيف
بالرضا تحلى الدنيا لو سكرك خفيف
حالك في عين غيرك شايفه حلم جميل
مفيش غير إننا نقول الحمد لله
فضل ونعمه من ربنا رزقه لينا
نشكر فضله وحده عليه التبديل
حسن سعيد ابراهيم
#نبض 💓 #يكتبه ✏️
تعليقات
إرسال تعليق