تسطيح

لما نموت إحنا قولي لمين الأرض هاتعيش

داحنا كان كل حلمنا عداله حريه و عيش

وقفنا كلنا شعب و شرطه و معاهم  جيش

لو فتشت جيوبنا ولا تحت البلاطه ما تلاقيش

غير وجع و هم صدقني كمان تحتها فرح مفيش

قولي منين أجيب و عنك إحنا ما بنخبيش

حاسس بينا على قولك ولا ناسي ماقولتليش

يا كبير منك بنشكيلك سامعني ولا ماسمعتنيش

أنا أبنك أخوك عمك خالك المواطن ماتشردنيش

دي امك و خالتك و عمتك قلت عينهم ماتبكيش

طيب يا عمنا يا ولد بطننا شَغلني وماتشحتنيش

مصر اتبرعنالها مش بجنيه لا باللي أغلى منه مفيش

بالواد و أخوه و شقى العمر إللي راح بعد تحويش

بيتنا و عايزين تهدوه يرضيك لحمك ما يتغطيش

يا ابن الأصول أصلك من طينها منها ما تحرمنيش

في قطر التنميه ركبني خدني معاكم ما تسطحنيش

😢😢

#مواطن