رغم أني
رغم أني
عايش في ضلمه
لكن حلمي البعيد نور
يصرف من الضلمه شرور
من صغر سني
راسم حلم جميل
ألوانه ألف لون
حتى لو خابت ظنون
عايش كأني
سلطان قول ملك ولا أمير
حتى لو عرشي طوب
عن حلمي مش هاتوب
و اديني مستني
طير يرفرف بجناحات
و وليف يفرح بالوصول
نهار الفرح كمان يطول
شئ هناك مطمني
بسمع صداه من بعيد
يمكن نبض قلب حد بريئ
ولا أمل في الضلمه جريئ
دافي أنا حضني
ضامم بين دلوعي بكرا
مستنيه بقلب أخضر وليد
واثق إنه جاي بكرا أكيد
دمعي ليه خَني
رغم أني بالأمل معروف
ساعه عايشها صبر و عمل
و ساعة نهايه وختام للأجل
واقع الحياه كتفني
لفلف حواليني حبال
شرد العقل و القلب بكى
رجع العقل مهموم اشتكى
عن روحي كلمني
قال يا عود أخضر عيش
حلمك جواك ماتقتلوش
الهم لو جالك ماتبكيلوش
حسن سعيد إبراهيم
نبض 💓 يكتبه 📝
جمهورية مصر العربيه
حقوق النشر محفوظه
تم التوثيق
تعليقات
إرسال تعليق