تحيا بينا تحيا لينا
#تحيا_بينا
#تحيا_لينا
هو حالنا ده
#غلطة منا
ولا #خالطة منا
اللي هايص واللي لايص
واللي ضميره حي
واللي من الطين عايص
اللي بيديها ويفديها
واللي بيحنيها
وبيهدم فيها
واحد مسهلاتي
كل الأمور
و واحد يبني
أدام الحلم سور
يالا غور
على المرتشي ثور
أصل الحكايه إحنا
اللي ظالمنا مننا فينا
غم في خلاط الهموم
علم في القلوب والهدوم
لكن مش هاتدوم
طب يالا عن الحرام صوم
وانت يالا شد حيلك قوم
تعالى هات ايدك معايا
نبني نعمر أزرع أرضي
و تنور سمايا
الحكايه فيها إنا
منهم لله اللي كارهينا
يفرحوا لحزننا
ويسعدهم دمع عينا
لكن تعالى نفكر
في الحل سوا
ونعرف للجرح دوا
مين مظلوم وبالظلم اتكوى
ومين قتل حلم
وبدم أخوه للخاين روى
تعالوا نتلملم نتجمع
نتكاتف
قولي إيه كمان
تضمني واضمك
أزيح عنك واشيل همك
تبقى خالي وابقى عمك
أو أبن خالي وأبن عمك
نفهم أننا واحد
ملايين لكن على قلب واحد
نتعاهد يكون حلمنا واحد
بلدنا بينا تحيا ولينا تحيا
ماهي لو لغيرنا تحيا
أحنا ليه نحيا
كلماتي حسن سعيد مرسي
تم الحفظ والتوثيق
تعليقات
إرسال تعليق