كله تمام ألف سلام
كله تمام ألف سلام
و مر العمر بيجري
والمُر ما مرش
عدت الأيام ورا بعضها
حتى الشهور كمان
وسنة بعد سنة
هو فاضل من العمر كام
حد يحسب ويقولي
اللي باقي مِنه أد أيه
يا ترى فرح ولا أحزان
يمكن يعدي زي عطسه
ولا يطول بينا زي الزُكام
الطريق صعب متاريس
والريح معاند مركبك
والشراع مكسور كمان
حاسس بغربة من زمان
حتى وسط الزحام
عمرك اللي راح ولا تندم عليه
واللي جاي مستني منه أيه
لما اللي راح ما حستش بيه
يبقى اللي جاي عيشه في المنام
غمض عينيك وارسم
لرحلتك نهاية
زَوُر فيها بألوان فرح
وامسح دمع الروح كمان
واضحك على نفسك
وقولها كله تمام
قلمك اللي بتكتب بيه
على سطر عمرك حزين
صوته بيصرخ أنين
و مداده بلون ليلك
أكسره كفايه تعيش أوهام
عشت طاير بجناحات
في دنيا ما بتعرفش غير الزور
ماهي دنيا دانيه
أصحى منها فوق
وسيبك من الأحلام
عيش بقى لنفسك يومين
أضحك وعلي صوتك بالضحكه
في ناس مستنيه تعيشها وياك
ولا هما دورهم كومبارس الأفلام
مظلوم يا عمر راح مني
ولا أنا المظلوم أنه راح
ما بين عتاب وجراح
خلاص انتهى زمن الملام
هاعيش عمري لو يومين
هاعيشه من قلبي لحالي
وألملم تحت جناحي نبضاتي
ولغيرهم مني ألف سلام
✍🏿حسن سعيد مرسي
قارئ الصور
تعليقات
إرسال تعليق