أخويا

فاضي شوية نرجع بالسنين
ياما اتحملت عشانك انين
وكام مرة مسحت من عيونك دمعتين
عايش الألم وارسملك ضحكتين

مالك بس قولي
شايل هم ليه
الصعب سوى نقسمه
ماديت أنا أيدي
فاكر أنت كان ردك إيه
كل مرة رد أصعب مالي قبله
عايزني أنسى
طيب أودي الجرح فين

أناديك تسمع ولا أنت هنا
تهمل وكأنك ناسي مين أنا
الله يرحم زمان أيام صغرنا
كان أبونا سعيد فخور بحبنا

مين غلطان فينا إحنا الاتنين
لا ألومك ولا تلومني لأننا غلطانين
صاحب الحق زعلان حزين
والغلطان راكبه شياطين

جتلك وانا جاي على نفسي
حبيت نقلب الصفحه واراضيك
يمكن روحك تصفى وتراجع نفسك
كان عنوان قاسي مني
امال لو كتبت لك سطرين

فاضي شوية نخطي ع الأيام والسنين
تعالى نمسح كل العتاب لو حتى كلمتين
انا مسامح وانت كمان سامح كأننا غريبين
كام غريب ظلمك وظلمني لأننا طيبين

وادي نفسك فرصه لبكرا
بس قولي باقي من عمرنا اد إيه
لو تعرف قولي كام
عشان نأجل الكلام لبعدين

كنت فاتح لك حضني ولسه مفتوحلك
بس بعد اللي حصل منك مستني اندهلك
خليك مكاني وانا مكانك أيه شكلك
لما سندك يصغرك امام ناسك وأهلك

طيب هاقولك أنا والله مسامح
حتى اني كنت مستني
تهدى وتكلمني لكن
شيطان الكِبر وكلنا بني أدمين