انا خِلك
أنا خِلك
كان مخنوق عايز يتكلم
موجوع نفسه يفضفض
جاه على باله يكلمها قال يحكلها
جاب ورقه وكمان قلمه ورح كاتب
محتاجلك جدا.
أيده اترعشت والورقه اتبلت
من دمعه فارقت رمشه
معرفش يحوشها جرحت خده
وكتافه من الحمل أتهدت.
جمع نفسه لملم أعصابه حاول يكتب
وسط مشاكله ويا ظروفه بيعافر
سيفه ضعيف بيكابر
بينهم بيأدن كإنه ف ملطه.
شخبط شخبط ولا عرف يوصف
ولا حتى يعبر
شرب قهوة كان بيفكر في سجاره
ينفخ فيها يطلع ناره
على ورقه يصرخ بجساره
بينه وبين نفسه حلم وراسمه
طلع الهم منابه وقاسمه
طريق كان ليه
والشوك ياخساره ماليه
خاوي الجوف وسواس فيه.
بص يمين وشمال فين أنتي
ياللي كنتي قايم أكتبلك
مخنوق الروح عايز أقولك
عاجز أوصفلك
بس راح أكتب على جراحي هدلك.
عاشق شمسك تابع ضلك
قولي حبيب قولي خلك
ولا يهمك قولي أميرك
حتى مصيرك
تايه ويايا ف بحرك
روحي مهرك عابر سدك عاشق ضحكك.
بلدي وأنا كلي فداها
كل منايا أرسم فرحك
أبويا وصاني
أداوي جرحك
حتى ولادي معايا على عهدك
بس ضميني في حضنك
عارفه هاقولك
أنا الشوك على غصنك
ان حد قرب منك
ولا بسوء يذكر إسمك
على كده رباني وأنا ربيتهم
مهما كان حال بيتهم
أنتي الوطن
حزني من أجلك شجن
ضُمي ولادك
هما عمادك وإحنا عنادك
وقت السقوط
أيدينا في إيدك
وأحنا وريدك
ودعوتك وقت قنوط
تعالي أدلك
مين منهم خاين
ومين فيهم خِلك
أبو ضحكه زور
يمشي يغور
خدي إبنك سندك
أبو قلب جسور
ماهو مش معقول
بعد ده كله
الحلم يموت في ولادك
جيل ورا جيل
يضيع بكلام معسول
كل ولادك جاين وياكي
كبير و صغير
الكل معاكي
نبني يالا نبني
نعمر أيوه نعمر
مواطن مع مسؤول
كل هدفهم أنتي
تنزل رايتك ولا تقوم
بس ولادك هنا معاكي
ضد وصد تتار ومغول
أو أي كلب بعقل مخبول
عارفه أنا مين
أنا خلك
واحد ماشي في ضلك
ومعاه كتير من ولدك
كلنا منك بيكي وليك
مش كلامي لوحدي
دا الكل بيقول
أنا خِلك
✍️حسن سعيد مرسي
تم الحفظ والتوثيق
تعليقات
إرسال تعليق